NA STORIA ANTICA (Silvestro - Vultaggio)

NA STORIA ANTICA
(Silvestro -Vultaggio )

Mi lu ricordu, eru nicareddu,
quannu arrivava ‘u tempu dâ vinnigna:
na coffitedda, forbici e cappeddu
e ‘nsunnacchiatu jia versu la vigna…
m’annuncia l’arba ‘u cantu di ‘n aceddu
e lu burgisi li picciotti ‘nsigna;
si parti già lu primu trattureddu
mentri lu mustu tutta l’aria ‘mprigna.

Mentri ch’agghiorna, arriva lu patruni
chi teni nta li spaddi ‘a coffitedda,
la posa ‘n terra, pigghia lu cutrúni
poi nesci la ricotta e ‘na vastédda.
Tutti vicini, misi a dinucchiúni,
‘ncumincia già la prima manciatedda,
susennu poi, cantannu ‘na canzuni,
cu’ pigghia lu filaru cu’ ‘a cartedda.

Stancu avvilutu, sutta di ‘na iucca
cercu ristoru pi la gran fatica;
scurri ‘u sururi chi dâ frunti sbucca,
lu purvirazzu nta la peddi ‘mpica;
Poi sentu ‘na buttigghia chi s’abbucca,
lu ciauru di lu vinu chi si spica
e quannu ‘a prima goccia arriva ‘n vucca:
sentu ‘u sapuri di ‘na storia antica !