Sunnu li dui ed è “Vennari Santu”,
si grapi lu purtuni ô “Purgatoriu”,
nta l’aria già si senti a-tipu un chiantu
mentri ‘i campani sonanu ‘u mortoriu.
Su’ tutti ‘n tiru, Consuli e Massari,
nun parla e aspetta, ‘a genti chi s’ammassa,
è tuttu prontu, si po cuminciari:
s’aspettanu tri corpa di grancassa.
E prima di sunari, comu ogni annu,
ci mannu la me preci a lu “Signuri”,
nun sentu friddu ma…jò staju trimannu:
è comu si sintissi un gran duluri!
Mi veni di parlarici un mumentu:
«Ti pozzu, jò, alliviari sti torturi?
Dimmillu soccu àju a fari, jò ti sentu,
dimmillu “Gesù Cristu!” Pi favuri.
Nun criu ci abbasta ‘na prijera mia,
nun penzu pò carmari stu turmentu,
nun pò abbastari sta me litanìa:
jò criu ch’un ci la fa mancu lu ventu!
“Signuri” picchì ‘un parli: nun mi senti?
Capisciu…li dulura, ’un poi parlari…
Ti giuru, ‘un pozzu fari propriu nenti,
nun pozzu fari autru chi sunari…
Jò speru chi ogni nota chi ti mannu,
a tia arrivassi comu un vasuneddu,
jò preu “Signuri”, chi sta nenia, ‘st annu,
vulassi a ciancu a tia, comu ‘n aceddu.
Vogghiu pinzari, comu musicanti,
ch’ogni biscroma c’’u strumentu manna,
sirvissi a tia, com’è chi a lu lattanti,
pi dormiri, ci servi ‘a ninna nanna.
“Signuri” sugnu cca, nun ti scantari,
su’ quinnici anni ormai: ti lu scurdasti?
E nun c’è nenti chi mi fa stancari:
sta doti fusti tu chi m’’a mannasti!
Sta lacrima? Chi voi, forsi è lu ventu,
ma quali chiantu: ch’è sta fissaria?
Penza, chiuttostu, ô nostru appuntamentu:
duminica di Pasqua…aspettu a “Tia!”»
Sunnu li dui ed è “Vennari Santu”,
si grapi lu purtuni ô “Purgatoriu”,
la “prucissioni” nesci arantu arantu
mentri ‘i tammura sonanu ‘u mortoriu.
Su’ tutti ‘n tiru, Consuli e Massari,
aspetta ‘a genti, fora, misa a massa,
è tuttu prontu, si po cuminciari…
e partinu ‘i tri corpa di grancassa.
