E PACI SIA (Oddo - Vultaggio)

E PACI SIA! (Ninna nanna Natalizia)
(A. Oddo - G.Vultaggio)

Mi sunnai lu Bammineddu,
nta ‘na stadda, mezzu ‘u friddu,
lu taliai e ci addumannai:
“Tuttu sulu, chi ci fai ?”

“Mi lassaru cca un mumentu
picchì fora è un gran firmentu,
li disgrazi e li turmenti
nun v’abbastanu pi nenti.
Ma ch’aviti nta sta terra,
vi faciti puru ‘a verra?
Mè Patruzzu e ‘a Matri mia
sunnu fora pi la via,
cu lu Bovi e ‘u Sciccareddu
sunnu fora mezzu ‘u friddu,
a priari ‘u Re Putenti
pi la paci tra la genti!
Puru jò vulía partìri,
ma mi rissuru…’unn’â ghiri?
Ddocu sutta ‘un si ci sta
si nun aj marvagità!

Autri cosi vulia riri,
ma ‘un mi ficiru finiri…
ci ricia ‘un ci voli nenti
pi la paci tra la genti:
Tanticchiedda di dicoru
fa di l’omu gran tisoru,
cu lu stúriu ‘n abbunnanza
s’alluntana la ‘gnuranza,
cumprinzioni e tant’amuri
p’alliviari li duluri
e pi l’odiu chi ci sta
sacchi di sincerità.”

Ora chi veni Natali
nun facémuni cchiù mali,
e vuciamu: “basta verra”
e “sia Paci” nta sta terra!”